ახალგაზრდა დერმატო-კოსმეტოლოგის, მარიამ გზირიშვილის საქმიანობა ესთეტიკური მშვენიერების შექმნას ემსახურება. ყოველდღიური სამუშაო რეჟიმის ფარგლებში, პაციენტები მას არაერთი სურვილით მიმართავენ, შესრულებას მიანდობენ, რადგან შედეგი მაქსიმალურად ჯანსაღი კანი და კორექციით მიღებული ბუნებრივი შედეგებია.

რატომ დაინტერესდით ესთეტიკური მედიცინის სფეროში მუშაობით?
სამედიცინო სფეროთი გატაცებული საკმაოდ პატარა ასაკიდან ვიყავი. მიმართულების არჩევისას კი საკუთარმა გამოცდილებამ მიბიძგა. თავად მქონდა კანზე პრობლემები, რის გამოც გამოსავლის გზების ძებნაში უამრავი საინტერესო რამ შევისწავლე, დავინტერესდი და გადავწყვიტე პროფესიას სწორედ ამ მიმართულებით გავყოლოდი.

თქვენი გამოცდილებით, რომელი პროცედურებია დღესდღეობით ყველაზე აქტუალური?
გამოვარჩევდი, ე.წ. შემავსებლების, ფილერების მეშვეობით ჩატარებულ პროცედურებსა და აკნესთან ბრძოლის მეთოდებს.

ასევე კანის ღრმა წმენდის პროცედურებს გამოვყოფდი, რომელიც კარბონით ჩატარებულ მიკროპილინგს გულისხმობს. კანის შრეებში ღრმად ჩაღწევის მეშვეობით, ხდება სრულფასოვანი წმენდა, შემდეგ ფორების დახურვა და კანის გაჯანსაღება. მსგავსი პროცედურა წელიწადში მინიმუმ ორჯერაა რეკომენდებული.

რამდენად რთულია აკნესთან ბრძოლა და არის თუ არა რეალური მოკლე ვადაში მისგან განკურნება?
ეს არის ინფექციური დაავადება, რომელიც ძირითადად მოზარდებისთვისაა დამახასიათებელი და უკავშირდება არასახარბიელო გარემო პირობებს, კვებასა და ჰიგიენური ნორმების ყოველდღიური რუტინის შეუსრულებლობას.
უნდა აღინიშნოს, რომ მისგან განკურნება 3 თვიდან ვადაშია შესაძლებელი და ამის არაერთი მაგალითი ჩვენი კლინიკის ისტორიაში ინახება. მთავარია, სწორად მოხდეს მკურნალობის პროტოკოლის შედგენა, რომელშიც გათვალისწინებული იქნება მეზოთერაპია თუ სახის ღრმა წმენდის აპარატურული და მექანიკური მეთოდები.

რის საშუალებას გვაძლევს ე.წ. შემავსებლები?
ამ ჯადოსნურ საშუალებაზე ძალიან დიდი მოთხოვნაა. კარგი ხარისხის „ფილერები“ ორგანიზმისთვის საჭირო ჰიალურონის მჟავას შეიცავს და კანის ლიფტინგის, გამოკვებისა და გაჯანსაღებისთვის გამოიყენება. ასევე ინიექციური პლასტიკისთვის ვიყენებთ – ტუჩის მოცულობის გასაზრდელად, ნაოჭებთან საბრძოლველად, ცხვირისა თუ ყვრიმალების და ზოგადად, სახის ფორმირებისთვის. შეიძლება ითქვას, რომ შემავსებლებმა რინოპლასტიკაც კი ჩაანაცვლა. შედეგი შთამბეჭდავია, რეაბილიტაციის პერიოდი კი თითქმის მოხსნილია − პაციენტი პროცედურის შემდეგ მაშინვე უბრუნდება ცხოვრების ჩვეულ რიტმს.

რა ტიპის მითები გსმენიათ ყველაზე ხშირად, რომლებსაც არსებობის საფუძველი არ აქვს?
ის, რომ თითქოს ცხიმიანი კანი დატენიანებას არ საჭიროებს. ეს ასე არ არის. დატენიანება ნებისმიერი ტიპის კანისთვისაა აუცილებელი. მაშინაც კი, როცა ცხიმიან კანზე აკნეს ვებრძვით და ცხიმოვანი ჯირკვლების დასამშვიდებლად კანს ხელოვნურად ვაშრობთ, ბალანსის შესანარჩუნებლად შემდეგ ვატენიანებთ.

არ არის სწორი მოსაზრება, რომ ფილერები საფრთხის შემცველია. თუმცა ხაზგასმით აღვნიშნავ, რომ უხარისხო საშუალების გამოყენების შემთხვევაში, ეს საშიშროება მართლაც არსებობს. თავად ფრანგული, შვედური და კორეული პრეპარატებით ვმუშაობ, რომლებშიც ყველა ნორმა ზედმიწევნითაა დაცული.

ასევე, მათი გამოყენება არავითარ შემთხვევაში არ ნიშნავს არაბუნებრივ შედეგს. ეს დამოკიდებულია შემავსებლების ხარისხსა და რაღა თქმა უნდა, ხელობაზე.

რას ურჩევდით მათ, ვისაც ზაფხულის პერიოდში ჯანმრთელი კანის შენარჩუნება სურთ?
ვურჩევდი, მოერიდონ მზის აქტიურ სხივებს, რადგან ამაზე ცუდს ვერაფერს გაუკეთებენ კანს. რუჯისთვის კი კანი ბიორევიტალიზაციის დახმარებით მოამზადონ.

რამდენად ხშირია სიახლეები თქვენს სფეროში?
აქ რამდენიმე თვეც განვითარებას ნიშნავს, ყველაფერი იხვეწება. ასევე, იცვლება ტენდენციები. თითოეულ სიახლეს სხვადასხვა კონფერენციაზე ვეცნობი, რომელსაც ამოუწურავი სწავლის პროცესი ახლავს.