ნებისმიერი ტიპის ვარჯიშის შემდეგ ბუნებრივია სიამოვნებისა და თვითკმაყოფილების შეგრძნება გეუფლებათ. თუმცაღა სანამ ამ კმაყოფილებამდე მიხვალთ კიდევ რამდენიმე ნაბიჯია გასავლელი. იმისთვის, რომ თქვენმა ვარჯიშმა შედეგი გამოიღოს რამდენიმე აქტივობას უნდა აარიდოთ თავი. მოდით ვნახოთ რა გვეკრძალება ფიზიკური დატვირთვის შემდეგ და რატომ.

არავითარი მნიშვნელობა არ აქვს როგორ ივარჯიშეთ, ნებისმიერი ფიზიკური დატვირთვის შემდეგ ძილი არასწორად მიიჩნევა. მაგალითად დინამიური აერობიკის ვარჯიშის შემდეგ ნაკლებად შესაძლებელია ძილის სურვილი გაგიჩნდეთ, თუმცაღა ისეთი ვარჯიშების შემდეგ, როგორიცაა იოგა ან პილატესი, თქვენ მოდუნდებით და შესაბამისად მოგერევათ ძილი. სწორედ ამ დროს უნდა გამოიჩინოთ ნებისყოფა და შეიკავოთ თავი. ძლიერი ფიზიკური დატვირთვის შემდეგ ორგანიზმს სხვა მდგომარეობაში გადასვლა მშვიდი ტემპით ესაჭიროება, ამიტომ გირჩევთ მინიმუმ 2 საათის მანძილზე ეცადეთ არ დაიძინოთ.

ვარჯიშის დროს სითხის მიღებაზე ინსტრუქტორების აზრი ყოველთვის იყოფა, თუმცაღა ერთი რამ რაც ცხადია - ვარჯიშის შემდეგ ორგანიზმი წყლის დაბალანსებას მოითხოვს. ზოგიერთი ადამიანი თვლის, რომ ვარჯიშის შემდეგ წყალი უნდა მიიღოს თავშეკავებულად, სინამდვილეში კი ორგანიზმმა იმდენი სითხე უნდა მიიღოს რამდენსაც ის თქვენგან მოითხოვს. ეს მნიშვნელოვანია თქვენი ჯანმრთელობისთვისაც და ვარჯიშის ეფექტურობის გაზრდისთვისაც. ასევე მნიშვნელოვანია, რომ ფიზიკური დატვირთვის შემდეგ მიიღოთ წყალი და არა გაზიანი სასმელი, წვენი ან ენერგეტიკული სასმელი, რომელსაც ხშირად მეტაბოლიზმის გასაუმჯობესებლად იღებენ - ეს კი სრული აბსურდია.

ფიზიკური აქტივობისას თქვენ ბევრ ენერგიას ხარჯავთ, რომელსაც შევსება აუცილებლად სჭირდება. იმ შემთხვევაშიც კი თუკი წონის დაკლება გსურთ, ვარჯიშის შემდეგ დიდი ხნის მანძილზე შიმშილი ვერ მოგიტანთ სასურველ შედეგს. თუმცა ეს არ ნიშნავს იმას, რომ სპორტდარბაზიდან გამოსვლისთანავე უნდა ჭამოთ დიდი რაოდენობით საჭმელი. ვარჯიშის დროს ჩვენ ვაჩქარებთ კალორიების წვის პროცესს, რომელიც აქტივობის დასრულების შემდეგაც გრძელდება, შესაბამისად ორგანიზმს ალტერნატიული ენერგიის წყარო სჭირდება. იმისთვის, რომ წონაშიც უკეთ დაიკლოთ და არც ენერგიისგან დაიცალოთ, დაახლოებით 1,5-2 საათის შემდეგ წაიხემსეთ, სასურველია ისეთი საკვებით, რომელიც ნახშირწყლებს შეიცავს. მაგალითად შეგიძლიათ მიირთვათ ბოსტნეულის სალათი ან ქათმის მკერდი.

ზოგადად აერობიკის ვარჯიშები 5-10 წუთიანი გაწელვებით სრულდება, თუმცა ჩვენ ვარჯიშის ამ ნაწილს ხშირად ვტოვებთ, რადგან დიდ ყურადღებას არ ვანიჭებთ. ვარჯიშის ეს ეტაპი არ არის კუნთების დამატებითი დაჭიმვისთვის, არამედ პირიქით, განტვირთვისთვის. ფიზიკური დატვირთვის შემდეგ თქვენი კუნთები რამდენიმე საათის მანძილზე დაძაბული და დაჭიმულია, სწორედ იმისთვის, რომ ისინი "დაამშვიდოთ" აუცილებელია ოდნავ მაინც გაიწელოთ - ეს ერთი შეხედვით უმნიშვნელო მოძრაობა სასარგებლოა თქვენი კუნთებისთვის და ასევე საგრძნობლად ეფექტურს გახდის ვარჯიშს.