მოუთმენლად ველოდებოდი თარიღს, როცა ამ პროექტის დაფარული არსი უნდა გაცხადებულიყო. ჩემთან ერთად უამრავი ადამიანი „დაინტრიგდა“ ამ ამბით. სოციალური კამპანიის რეალურმა სახემ, რომელიც საზოგადოებისთვის „მერსედეს-ბენცის“ მოდის კვირეულზე გამჟღავნდა, ყოველგვარ მოლოდინს გადააჭარბა. დღეს, როცა მოდა გამოხატვის საშუალებაა, პროექტის ავტორებმა შეძლეს და ამ ფორმით ჩართეს სოციალურ კამპანიაში ის ადამიანები, ვისაც ძალიან სჭირდება საზოგადოების თანადგომა. გემოვნებით და ხარისხიანად შეფუთული პროექტი მსოფლიო ბრენდიც კი შეიძლება გახდეს. ამიტომ ვნახოთ, როგორ აპირებენ სოციალური კამპანიის „ძე“, იგივე ძეგვის თავშესაფრის იდეის სამომავლო განვითარებას პროექტის ავტორი, „საქართველოს ამერიკელი მეგობრების“ აღმასრულებელი დირექტორი ლენა კილაძე და სოციალური კამპანიის კრეატიული ხელმძღვანელი, სარეკლამო სააგენტო „ვინდფორსის“ წარმომადგენელი ნინო გორდელაძე.

როგორ გაჩნდა იდეა?

(ლენა): ფილანტროპიის იდეის პოპულარიზაცია ჩვენი ორგანიზაციის მისიის ნაწილია. სხვადასხვა აქტივობას ვგეგმავთ იმისათვის, რომ საზოგადოების ცნობიერება ავამაღლოთ ფილანტროპიის კუთხით − იქნება ეს საქველმოქმედო ფორმატის გალასაღამოები თუ სხვადასხვა ტიპის აქციები, რათა საზოგადოების ესა თუ ის ფენები ჩავრთოთ სოციალური პრობლემების გადაწყვეტაში. ფილანტროპი ხომ ნებისმიერი ადამიანი შეიძლება იყოს − სკოლის მოსწავლით დაწყებული, მსხვილი ბიზნესკორპორაციით დამთავრებული. ჩვენს საქმიანობაში საზოგადოების ყველა შრეა ჩართული − ბიზნესსექტორი, დიპლომატთა წრე, ხელოვანი ადამიანები, სკოლის მოსწავლეები, ანუ საზოგადოება მთლიანად ჩართულია ამ საქმეში, სხვადასხვა ფორმით. იდეაც აქედან გაჩნდა − გვინდოდა უფრო მეტი ადამიანი ჩაგვერთო და უფრო მეტ ადამიანამდე მიგვეტანა პრობლემა, შეგვეცვალა ხედვის რაკურსი, რადგან გვჯერა, რომ პრობლემების გადაჭრა ერთობლივი ძალისხმევითაა შესაძლებელი. ხშირ შემთხევაში მხოლოდ ისიც კი საკმარისია, რომ ადამიანებს სწორად დაანახო და შემდეგ ისინი მზად არიან გააკეთონ ყველაფერი, რაც შეუძლიათ. ამიტომ გადავწყვიტეთ მიგვემართა სოციალური კამპანიის ფორმატისთვის (საქართველოში ეს ჯერ კიდევ ახალი თემაა), კრეატიულ სააგენტო Windfor’s-თან თანამშრომლობა კი, ჩვენი აღმოჩენა იყო... პირველი შეხვედრიდან, როგორც კი მოვუყევით ჩვენი პროექტების, იდეებისა და სურვილის შესახებ, თანამშრომლობისა და მხარდაჭერის უპირობო მზადყოფნა გამოთქვეს. ჩვენ შორის საოცარი ურთიერთგაგება (და პარტნიორობა, ასე დავარქმევდი) დამყარდა...
ვფიქრობთ, ამ „ქიმიის“ შედეგია ეს საოცარი იდეაც: „ძე“ ფსევდობრენდის შექმნის და მისი მეშვეობით სხვა „სოციალურ ბრენდზე − ძეგვზე“ ყურადღების მოულოდნელად გადატანა, რისთვისაც Mercedes-Benz Fashion Week იდეალური პლატფორმა გახდებოდა. გაგვიმართლა, რომ სოფო ჭყონიაც პირველსავე შეხვედრაზე დაგვეთანხმა − იმ სოციალური კამპანიის განხორციელებაზე, რომლის ანალოგი და პრეცედენტი საქართველოში არ არსებობდა და დროც ძალიან მცირე იყო... ასე გაჩნდა ფსევდობრენდი „ძე“, რომელმაც Fashion Week-ის ფარგლებში თავისი არსებობა დაიწყო და საზოგადოებას „ძე-ძეგვი“− ქართული პროექტი შესთავაზა.

როგორი იყო მუშაობის პროცესი?

(ლენა): მუშაობის პროცესი ძალიან ინტენსიური და საინტერესო გამოდგა. ამ ტიპის თანამშრომლობა ნამდვილად უპრეცედენტო ფაქტია სოციალური კამპანიის ფარგლებში. თამამად შეიძლება ვთქვათ, რომ მსგავსი პროექტი საქართველოში არ განხორციელებულა და მოხარულები ვართ, თუ ეს ტრენდული გახდება და სხვებიც აიტაცებენ ამ გამოცდილებას. მით უმეტეს, ხმამაღალი ნათქვამი არ იქნება, თუ ვიტყვით, რომ „საქართველოს ამერიკელი მეგობრებისთვის“ ერთგვარად ტრადიციაა ავანგარდში ყოფნა ამ კუთხით − იგი პირველი საქველმოქმედო ორგანიზაცია იყო, რომელმაც მხარი დაუჭირა პირველ უფასო ჰოსპისს, შემდეგ პირველ და ერთადერთ უფასო შინ მოვლის სამსახურს, ქუჩის ბავშვთა პირველ სახლს ძეგვში. დაამკვიდრა ამერიკული ტიპის გალას ტრადიცია საქართველოში და სხვა მრავალი. თუ გადახედავთ ჩვენს საქმიანობას, ხშირ შემთხვევაში უნიკალურ პროექტებს ვუჭერდით მხარს და დღესაც ვაგრძელებთ ამ სტრატეგიას.
(ნინო): მუშაობის პროცესში ბევრ ადამიანთან მოგვიწია შეხვედრა, რომ შემოქმედებითი გუნდი, რომელიც ფოტო-ვიდეოგადაღებაზე იმუშავებდა, შეკრულიყო. პროექტის გარშემო შემოიკრიბნენ მართლაც საუკეთესო ხელოვანები. მნიშვნელოვანი იყო ისიც, რომ ყველა ფიქრის გარეშე თანხმდებოდა პროექტში მონაწილეობას − ყველა საოცარი ენთუზიაზმით მოეკიდა ამ სოციალურ კამპანიას და მე მგონი ეტყობოდა კიდეც, რომ განსაკუთრებული სიყვარულით იყო გაკეთებული. როგორც იცით, გადაღებები ძეგვში მიმდინარეობდა და მონაწილეობასაც თვითონ ძეგვის მცხოვრებლები იღებდნენ. მათთვის ეს საზოგადოებასთან ინტეგრაციის საუკეთესო ფორმა იყო.

რატომ ძეგვის თავშესაფარი?

(ლენა): ალბათ იმიტომ, რომ ძეგვის თავშესაფარი არის პროექტი, რომელსაც ჩვენ დიდი ხანია ვეხმარებით და იმიტომ, რომ ის უმნიშვნელოვანესი ადგილია. თავისი არსებობის პირველ ეტაპზე ძეგვის ბავშვთა სახლს გადარჩენილი ჰყავს 120-ზე მეტი ე.წ. ქუჩის ბავშვი, რომლებიც ძეგვმა პირდაპირი მნიშვნელობით მოწყვიტა ქუჩას და დააბრუნა ნორმალურ, სრულფასოვანი ცხოვრების რიტმში. დღეს ბევრი მათგანი წარმატებულია − სწავლობს, მუშაობს, ჰყავს ოჯახი... ნაწილი ისევ ძეგვში ცხოვრობს. 2010 წლიდან ძეგვის ბავშვთა სახლი გარდაიქმნა თავშესაფრად. დღეს ძეგვის თავშესაფარი ერთადერთი შერეული ტიპის თავშესაფარია, რომლის მსგავსი არ მოიპოვება საქართველოში − აქ 80-ზე მეტი ადამიანი ცხოვრობს. მისი მნიშვნელობიდან და უნიკალურობიდან გამომდინარე, სწორედ ძეგვი შეირჩა კამპანიის საიმიჯო პროექტად და ვფიქრობთ, სწორი არჩევანი იყო!

რატომ აირჩიეთ Mercedes-Benz Fashion Week-ის კვირეული?

(ლენა): „მერსედეს-ბენცის“ მოდის კვირეული სწორედ იმიტომ ავირჩიეთ, რომ ადამიანების ყურადღება, რომელიც ინტენსიურად იყო მიპყრობილი მოდის კვირეულზე, ძეგვზე გადმოგვეტანა. MBFW კონცეფციის პირდაპირი გაგრძელება გახლდათ და გაგვიხარდა, რომ სოფო ჭყონიამ მაშინვე დაინახა მისი მნიშვნელობა და სიხარულით დაგვთანხმდა პროექტის განხორციელებაზე. ბოლო წლებში მოდის სამყარო ხშირად იკავებს სოციალურ პოზიციას და გვიხარია, რომ ქართული მოდაც, როგორც მსოფლიო მოდის მნიშვნელოვანი ნაწილი, პასუხობს ამ გამოწვევას.

როგორ შუძლიათ ადამიანებს ამ პროექტში ჩართვა?

(ლენა): ამ პროექტში ჩართვა ნებისმიერ მსურველს შეუძლია. იდეაც ეს იყო − პროექტისათვის შექნილია საიტი Dze Georgian Project, საიდანაც შესაძლებელია შემოწირულობის გაკეთება და ამ ეტაპზე უკვე არსებობს სამაჯურები, რომლებიც სხვადასხვა მაღაზიაში იყიდება. მათი შეძენით შემოსული თანხა მთლიანად ამ პროექტს მოხმარდება. მომავალში ამ მაღაზიების რაოდენობა გაიზრდება. აგრეთვე, გვინდა და ვფიქრობთ, რომ Dze გადაიქცეს ბრენდად − შემოიკრიბოს თავის გარშემო ნიჭიერი შემოქმედები, როგორც საქართველოში, ისე საზღვარგარეთ. თავში ერთდროულად უამრავი იდეა მოდის და ვფიქრობ, ეს ახალი, დიდი კამპანიის დასაწყისი იქნება.

დაბოლოს: ნინო, თქვენ, როგორც ამ კამპანიის შემოქმედებითი ნაწილის განმახორციელებელი მხარე, რას იტყოდით ამ პროექტზე?

(ნინო): მოდური ტანსაცმელი და აქსესუარები მარტივად ექცევა საყოველთაო ყურადღების ცენტრში. ყველა საუბრობს ე.წ. ქუჩის მოდაზე − ქურთუკები, მაისურები, კედები, რომლებიც გასული საუკუნის 90-იანებში გვეცვა, ისევ აქტუალურია და დღევანდელი ჩაცმულობის განუყოფელი ნაწილი გახდა. ადამიანები, რომელთაც თანამედროვე დიზაინერების მიერ შექმნილი, ძვირადღირებული ტანისამოსი აცვიათ, მუდმივად ხვდებიან სარეკლამო ბროშურებსა და მუსიკალურ ვიდეორგოლებში, მათი ფოტოებითაა აჭრელებული მოდის ჟურნალები. თუმცა, არიან სხვებიც − მსგავსი, ზოგჯერ იდენტური ჩაცმულობით, მაგრამ მათზე თითქმის არავინ საუბრობს. ეს ადამიანები ძეგვის თავშესაფარში ცხოვრობენ და ტანსაცმელი, რომელიც მათ აცვიათ, არა ტრენდული რეპლიკა, არამედ ჯერ კიდევ ოთხმოცდაათიანებში შექმნილი „ორიგინალებია“. მათი სოციალური მდგომარეობა მთლიანადაა დამოკიდებული საზოგადოების ჩართულობაზე და ამ საზოგადოებაში არსებულ ფილანტროპიის კულტურაზე. ამიტომაც გადავწყვიტეთ, თანამედროვე მოდური ტრენდების დახმარებით საყოველთაო ყურადღება ძალიან მნიშვნელოვანი საკითხზე − ქველმოქმედებაზე მიგვეპყრო. „ძე − ქართული პროექტი“ ტანსაცმლის ფსევდობრენდია, რომლის პრეზენტაცია მაისის დასაწყისში, Mercedes-Benz Fashion Week-ზე შედგა.

პრეზენტაციამდე დაახლოებით ერთი კვირის განმავლობაში, აქტიური სარეკლამო კამპანია მიმდინარეობდა. შეიქმნა მოლოდინი, რომ „ყველასთვის კარგად ნაცნობი სახელი“ ქართველი საზოგადოების წინაშე ახალი პროექტით წარდგებოდა. სოციალურ ქსელში გავრცელებული ვიდეორგოლისა და ქალაქში გამოფენილი პოსტერების გმირები „ძე“-ს იდუმალებით მოცული მოდელები იყვნენ. მოსალოდნელი სიახლის შესახებ საუბრობდნენ სოციალური მედიაინფლუენსერები და ინტერნეტგამოცემები. ბოლოს, მოდის კვირეულზე, საერთო სივრცეში, ალტერნატიულ ჩვენებაზე შეკრებილი აუდიტორიის წინაშე გაირკვა, რომ „ძე“ (ყველასთვის ნაცნობი სახელი) სინამდვილეში ძეგვია, მოდელები კი, ძეგვის თავშესაფარში მცხოვრები ადამიანები არიან.