მსოფლიოში განვითარებული მოვლენებიდან გამომდინარე, ერთ-ერთ ყველაზე მნიშვნელოვან საკითხად რჩება, თუ როგორი იქნება ტურიზმის განვითარების შემდგომი ეტაპები 2021 წელს. რაზე იქნება ყველაზე დიდი მოთხოვნა, რომელი მიმართულებები განვითარდება? Booking.com-ის, სხვადასხვა საერთაშორისო გამოცემისა და ორგანიზაციის გამოკითხვის შედეგად, 2021-ში აქტუალური იქნება შემდეგი ტიპის სამოგზაურო ტრენდები:
ველნეს-ტურიზმი
COVID-ის ეპოქაში შეიცვალა მოგზაურობის მოყვარულ ადამიანთა დამოკიდებულებები და ხედვები ტურიზმთან დაკავშირებით. ჯანმრთელობა და ველნესი არასოდეს ყოფილა ისეთი მნიშვნელოვანი, როგორიც დღესაა. მოგზაურობის მთავარ პრიორიტეტად იქცა გამაჯანსაღებელი პროცედურები. ველნეს-დასვენება შესანიშნავი შესაძლებლობაა ჩვენი იმუნიტეტის ასამაღლებლად და ცხოვრების ჯანსაღი წესის შენარჩუნებისთვის.
დისტანციური მუშაობა + დასვენება, ე.წ. Bleisure Travel
მუშაობა-დასვენების მსურველთა რაოდენობა ძალიან გაზრდილია და ეს ტენდენცია შენარჩუნდება მთელი 2021-ის განმავლობაში. ის კომპანიებიც კი, რომლებიც დიდი ხნის განმავლობაში ეწინააღმდეგებოდნენ დროდადრო შინიდან მუშაობას, ახლა აღიარებენ, რომ ეს ახალი გარდაუვალი რეალობაა. აქედან გამომდინარე, არსებობს იმის ალბათობა, რომ დამქირავებლებს შესაძლოა გაუჭირდეთ კიდეც თანამშრომლების ოფისში დაბრუნება გარკვეული პერიოდის განმავლობაში. თუმცა უკვე დავრწმუნდით იმაში, რომ ეს არცთუ დიდ პრობლემას წარმოადგენს, პირიქით − თანამშრომელს შესაძლებლობა აქვს შექმნას თავისზე მორგებული კომფორტული გარემო და იმუშაოს ნებისმიერ დროს ნებისმიერი ადგილიდან.
2021 წლის მეინსტრიმი ეკომოგზაურობა გახდება
2021 წელს ერთ-ერთ ყველაზე მნიშვნელოვან ადგილს ეკომეგობრული მოგზაურობა დაიკავებს. მოგზაურობის მოყვარულები უფრო მეტად გაიაზრებენ და გააცნობიერებენ, თუ რა გავლენას ახდენს მათი მოგზაურობა გარემოზე, თუნდაც ადგილობრივი ეკონომიკის მიმართულებით. ასევე რამდენად მნიშვნელოვანია ბუნებრივი რესურსების მდგრადი გამოყენება და ეკოსისტემის შენარჩუნება.
მოთხოვნა გაიზრდება იმ ადგილებში მოგზაურობაზე, სადაც უკეთესად გაუმკლავდნენ პანდემიას
გარკვეული პერიოდის შემდეგ, ჩვენ შევძლებთ ნათლად დავინახოთ, თუ რა გავლენა მოახდინა კორონავირუსმა მსოფლიოზე. ასევე გვეცოდინება, თუ რომელი ქვეყანა გაუმკლავდა პანდემიას უკეთესად. აქედან გამომდინარე, მოთხოვნაც უფრო გაიზრდება ამ ქვეყნებში მოგზაურობაზე. უსაფრთხოება ხომ ერთ-ერთ უმთავრეს როლს ასრულებს მოგზაურობის დასაგეგმად.
ადგილობრივი ტურიზმი
ადგილობრივი ტურიზმის როლი კვლავ აქტუალური იქნება. საზოგადოების დიდი ნაწილი საკუთარ ქვეყანაში მოიწყობს არდადეგებს და ეს შესანიშნავია. ამით ხელს შევუწყობთ ქვეყნის ეკონომიკის განვითარებას.
დასვენება უსაფრთხოებისა და სანიტარიის უმაღლესი სტანდარტით
COVID-19-მა უსაფრთხოების ზომების დაცვა კიდევ უფრო მნიშვნელოვან საფეხურზე აიყვანა. საზოგადოება უპირატესობას მიანიჭებს იმ ავიაკომპანიებს, აეროპორტებს და სასტუმროებს, რომლებიც მაქსიმალურად იცავენ ჯანმრთელობის და უსაფრთხოების ახალ საერთაშორისო სტანდარტს.
ვირტუალური მოგზაურობა
თუკი ნამდვილი მოგზაური ხართ, კარანტინი თქვენთვის ორმაგად რთულად გადასატანი აღმოჩნდებოდა, თუმცა ყველაფრიდან არსებობს გამოსავალი. ვირტუალური მოგზაურობა ტურიზმის კიდევ ერთი მთავარი ტენდენციაა, ეს კი იმას ნიშნავს, რომ მომხმარებლებს შეუძლიათ დაათვალიერონ ყველაფერი შინიდან გაუსვლელად. ამისათვის კი შეიქმნა ონლაინტურები, რომლებიც საშუალებას გვაძლევს განვაგრძოთ ჩვენი თვალსაწიერის გაფართოება და დავათვალიეროთ ჩვენთვის საინტერესო ადგილები.
