X Factor-ი მალიბუ ტუღუშიც ცხოვრებაში აქტიური მუსიკალური კარიერის დაწყებისთვის საუკეთესო საშუალება აღმოჩნდა. მომღერალი, რომელმაც მსმენელის გულები მარტივად დაიპყრო, ახალი ეტაპისთვის ემზადება.

ძალიან მალე ქართულ მუსიკალურ ჩარტებს მალიბუს ახალი ჰიტი დაიპყრობს, რომელიც სულ ცოტა ხანში მზად იქნება. მომღერალი ახალ სიმღერასა და ვიდეოზე მუშოაბს, რომელშიც როგორც მომღერალი აცხადებს, "ნამდვილ მალიბუს" ვიხილავთ.

ექსკლუზიურად OK!-ს მკითხველისთვის მალიბუ ტუღუშმა თავისი ახალი პროექტის შესახებ ჩვენთან ისაუბრა:

„ყოველთვის მინდოდა მუსიკაში ჩემი სათქმელი მეთქვა და საკუთარი შემოქმედება მქონოდა. დიდი ხნის წინ დავწერე სიმღერა, მაგრამ არ ვაპირებდი მის ჩაწერას. X Factor-მა ჩემს ცხოვრებაში ბევრი რამ შეცვალა, ამიტომ გადავწყვიტე, რომ ეს ყოფილიყო ჩემი პირველი სიმღერა და მას ძალიან მალე დავასრულებ.

სიმღერის ტექსტიც და მუსიკაც მე მეკუთვნის. ვფიქრობ, ქართველმა მსმენელმა ასე თუ ისე, უკვე გამიცნო და არ მგონია, ჩემი ეს პროექტი ვინმესთვის განსაკუთრებით გასაკვირი აღმოჩნდეს.

მე ვარ მუსიკოსი და არა „ქავერების“ შემსრულებელი მომღერალი, ამიტომ დარწმუნებული ვარ, ეს ალბომი ბევრ ჩემს გულშემატკივარს გაახარებს. ნელ-ნელა ალბომში შემავალ სხვა სიმღერებსაც შემოგთავაზებთ.

რაც შეეხება დეტალებს, მოგვიანებით ყველაფერს უკეთ მოგიყვებით და პირობას გაძლევთ, რომ ამ ყველაფერს თქვენი მკითხველი პირველი გაიგებს“, - განაცხადა მალიბუ ტუღუშმა ჩვენთან საუბრისას.