ქართული OK! წარმოგიდგენთ იმ არაჩვეულებრივ კოსმეტოლოგიურ პროდუქტს,
რომელიც მსოფლიოს პლასტიკური სილამაზის სამყაროში ოქროს სტანდარტად იქნა აღიარებული და რომლის შემქმნელი ქართველი ქირურგია.

ამჟამად ძალიან მოდურია გულის ფორმის სახის ოვალები, როგორიც აქვს მადონას და ჰოლივუდის ბევრ სხვა ვარსკვლავს.

წელს 20 წელი სრულდება, რაც APTOS-ის ძაფები შეიქმნა. 20 წლის წინ ქართველმა ქირურგმა მარლენ სულამანიძემ გამოიგონა უნიკალური ძაფი სახის კანის დასაჭიმად. ეს იმ დროის პლასტიკურ კოსმეტოლოგიაში ნამდვილი რევოლუცია გახლდათ, რადგან მაქსიმუმი, რაც მაშინ ტარდებოდა, იყო მეზოთერაპიისა და ხილის პილინგის პროცედურები, ხოლო სახის კანის გასაახალგაზრდავებელი სხვა დანარჩენი მანიპულაციები უკვე პლასტიკური ქირურგიის სფერო იყო.

ამ გამოგონების უნიკალურობის აღიარებას გარკვეული დრო დასჭირდა. 2000-იანი წლებიდან კი „აპტოსი“ ერთხმად მიიღო მსოფლიოს პლასტიკური კოსმეტოლოგიის სამყარომ. 2000 წელს ბრიუსელში ქართველ ქირურგს ამ გამოგონებისთვის ოქროს მედალი გადაეცა, 2002 წელს კი ის სინგაპურის „წლის ადამიანად“ დაასახელეს. მის გამოგონებას ძალიან დიდ პატივს სცემენ იაპონიაშიც, სადაც მარლენ სულამანიძის პატივსაცემად შეზღუდული რაოდენობის საფოსტო მარკებიც კი გამოუშვეს.

ახლა კი თავად ამ ჯადოსნური ძაფების შესახებ: „აპტოსის“ ძაფები არის არაჩვეულებრივი გზა იმისთვის, რომ სახის კანის დაჭიმვა ქირურგიული ჩარევის გარეშე მოხდეს. თუმცა, ის შესაძლოა გამოიყენონ როგორც კოსმეტოლოგიური, ასევე ქირურგიული პროცედურების დროს. არაქირურგიული გზით კანის დაჭიმვის დროს ეფექტი ნარჩუნდება დაახლოებით 1-2 წელიწადს, ხოლო ქირურგიული ჩარევის დროს ეფექტი 5 წელიწადს გრძელდება.

კოსმეტიკური დაჭიმვისას ძაფები შეჰყავთ კანქვეშ, ყოველგვარი ჭრილობის გარეშე. ამ ხერხით შესაძლებელია როგორც ერთი ზონის, ასევე სახის კომპლექსური დაჭიმვა. პროცედურა სულ რაღაც 15-30 წუთს გრძელდება. რა თქმა უნდა, ის არ ცვლის პლასტიკურ ქირურგიას, მაგრამ იძლევა იმის საშუალებას, რომ გადაავადოს ქირურგიული ჩარევის საჭიროება 40-50 წლამდე ასაკის ქალებისთვის, ანუ როცა პირველად ჩნდება ნაოჭები და კანი იწყებს მოშვებას.

„აპტოსით“ კანის დაჭიმვის შემდეგ, რეაბილიტაციის პროცესი, როგორც წესი, 2 კვირიდან მაქსიმუმ 1 თვემდე გრძელდება და ძირითადად სახის შეშუპებაში გამოიხატება, თუმცა არა იმ ხარისხით, რომ პაციენტის მუდმივად შინ დარჩენა გახდეს აუცილებელი. გარდა ამისა, როგორც ყველასთვის ცნობილია, არსებობს რამდენიმე სახის თერაპია (პლაზმოთერაპია, მეზოთერაპია), რომლებიც გვეხმარება შეშუპების რაც შეიძლება მოკლე დროში ასალაგებლად.

რაც შეეხება ძაფების ტიპებს, არსებობს გაწოვადი და გაუწოვადი ძაფები. გაწოვადი „აპტოსი“ გამოიყენება არაქირურგიული, კოსმეტიკური პროცედურების დროს და მაქსიმუმ 2 წელიწადში სრულად გაიწოვება ორგანიზმიდან, მუდმივი ძაფები კი გამოიყენება ქირურგიული მანიპულაციის დროს.

როგორც წესი, ქირურგიული მანიპულაციაც არ არის განსაკუთრებული სიმძიმის: კეთდება პატარა, უმნიშვნელო ჭრილობა – ნახვრეტი ყურისა და კისრის მიდამოში, საიდანაც ხდება სახის პრობლემურ ზონებში ძაფების გაჭიმვა. როგორც ზემოთ აღვნიშნეთ, მსგავსი პროცედურის ეფექტი 5 წელიწადს გრძელდება. ამ დროის გასვლის შემდეგ, პაციენტის სურვილის შემთხვევაში, პროცედურის გამეორების დროს ქირურგი კვლავ პირველ ნახვრეტში შედის, პოულობს ძაფებს და უკეთ მოჭიმავს მათ. ეს მეთოდი ძალიან პრაქტიკულია და განმეორებით ძირეული ჩარევისა და რთული მანიპულაციების თავიდან აცილების საშუალებას იძლევა. ძაფები ჰიპოალერგიულია და სრულიად უსაფრთხოა ადამიანის ჯანმრთელობისთვის.

ქართული OK! APTOS-ის ძაფების შესახებ პლასტიკური და ესთეტიკური ქირურგიისა და კოსმეტოლოგიის საერთაშორისო კლინიკების ქსელ „ტოტალ შარმის“ დერმატო-კოსმეტოლოგიის განყოფილების ხელმძღვანელ ალბინა ქაჯაიას ესაუბრა:

ალბინა ქაჯაია: „ქართველი ქალბატონები ყველაზე ხშირად სახის ოვალისა და ღაბაბის პრობლემებით გვაკითხავენ. როგორც წესი, თითქმის ყველა ქართველ ქალს აქვს ღაბაბი, რომელსაც ძალიან მარტივად უმკლავდება „აპტოსის“ ძაფი. 5-6 წლის წინ ქართველი პაციენტები შედარებით ფრთხილად და ეჭვით უყურებდნენ ამ პროცედურას, დღეს კი საკმაოდ თამამად იკეთებენ „აპტოსით“ სახის დაჭიმვას, რადგან ეს არის უნიკალური პროცედურა, რომლის დახმარებით, სულ რაღაც 1 თვეში, შეიძლება შეიცვალოთ ვიზუალი და გალამაზდეთ, თანაც – ყოველგვარი ღრმა ჭრილობისა და ზედმეტი ქირურგიული ჩარევის გარეშე.

როგორც წესი, აპტოსით სახის დაჭიმვის დროს აუცილებლად ვითვალისწინებთ თანამედროვე ტენდენციებს. მით უმეტეს, თუ ეს პაციენტების მოთხოვნაცაა.

მაგალითად, ამჟამად ძალიან მოდურია გულის ფორმის სახის ოვალები, როგორიც აქვს მადონას და ჰოლივუდის ბევრ სხვა ვარსკვლავს. იგულისხმება გულის ფორმის სახის ოვალი, როცა ლოყების ზედა ნაწილი მაღლაა აზიდული. ამის ეფექტს ვიზაჟისტები თავისებურად, ფერთა გამის შეხამებით იძლევიან, ხოლო ჩვენ „აპტოსის“ ძაფებით ვწევთ ლოყებს მაღლა და ვიღებთ ულამაზეს „ტრენდულ“ სახეს“.