მომღერალი სალომე ბაკურაძე ბიჭის დედა გახდა. სალომესთვის ეს პირველი შვილია, ხოლო, მისი მისი მეუღლისთვის, ლაშა ბასლანძისთვის - მეორე, მას პირველი ქორწინებიდან გოგონა ჰყავს.

სალომე ბაკურაძე სოციალურ ქსელში შვილის პირველ ფოტოს აქვეყნებს და უამრავ მილოცვას იღებს.

შეგახსენებთ, რომ რამდენიმე თვის წინ სალომემ ორსულობასთან დაკავშირებით პირველი ექსკლუზიური კომენტარი სწორედ OK!-სთან გააკეთა, სადაც ასევე ვრცლად ისაუბრა საკუთარ თავსა და მეუღლეზე:

მე და ლაშა
„ლაშიკო ისეთ დღეს გავიცანი, რომ აუცილებლად ერთად უნდა ვყოფილიყავით. ეს მოხდა 25 დეკემბერს – ქრისტეშობა დღეს, თუმცა თავიდან ყველაფერი მეგობრობით დაიწყო. მე, ჩემს კოლეგასთან ერთად, ქალაქგარეთ კონცერტზე მივდიოდი, იმ მანქანაში, საჭესთან ლაშა დამხვდა. მგზავრობისას უკვე დავმეგობრდით და სულ მეუბნებოდა, შენი აურა მაბედნიერებსო. წელიწადნახევრის შემდეგ გამოვუტყდით ერთმანეთს სიყვარულში. ესეც არაორდინარულად მოხდა. არ ვიცი რა შეგრძნება მქონდა, არ ვიცოდი ვინ იყო – შეყვარებული, მეგობარი თუ ვინ... ერთს კი ვგრძნობდი – თავს შევაკლავდი იმისთვის, რომ ლაშა ჩემთან ერთად ყოფილიყო. ვხვდებოდი – ეს ჩვეულებრივი მეგობრობა აღარ იყო. ლაშა გარკვეული დროით იტალიაში გაემგზავრა და იქიდან ყოველწამიერი ურთიერთობა გვქონდა. უკვე ვეღარ ვძლებდით უერთმანეთოდ. წასვლის წინ, ავგაროზად, პატარა ღიმილი დამიტოვა, თვლებით მოჭედილი, რომელიც დღემდე ჩემი ავტომანქანის გასაღებს ამშვენებს, მე კი ჭიამაია ვაჩუქე, როგორც ბედნიერების სიმბოლო. ამ საჩუქარს ისიც დღემდე თან ატარებს. სანამ ჩამოვიდოდა, მითხრა: ერთი დღით კი არა, ერთი საათით რომ გნახო, იცოდე, რომ ჩემი ცოლი იქნებიო. მოულოდნელად ჩამოვიდა იტალიიდან.

ისევ კონცერტზე ვიყავი. როგორც კი ტელეფონში მისი ხმა გავიგე, ვეღარ მივხვდი რა დამემართა. არავინ და აღარაფერი მახსოვდა. როცა შევხვდით, ჩავეხუტეთ ერთმანეთს და ორივეს ცრემლები მოგვდიოდა. ირგვლივ ყველა და ყველაფერი დამავიწყდა. გასაოცარი ის არის, რომ პირველს მე მათქმევინა, რომ მიყვარს. „გიყვარვარ?“ – მკითხა. მე რატომ მეკითხები-მეთქი, დარცხვენით ვკითხე. მიპასუხა, აბა, მე კი იცი, რომ მიყვარხარო, და მეც, ცოტა თვალცრემლიანმა ვუპასუხე, რომ მიყვარს. წელიწადნახევრის შემდეგ, ჩვენივე დანაზოგით, ისე, რომ მშობლებმა არაფერი იცოდნენ, ერთმანეთს ვუყიდეთ ბეჭდები, მშობლები რესტორანში დავპატიჟეთ, ერთმანეთი გავაცანით და იქვე გამოვუცხადეთ, რომ უკვე ბეჭდებიც გვიკეთია. მშობლებისთვის ეს უდიდესი სიურპრიზი იყო. ამას მოჰყვა ქორწილი, რომელშიც ისეთი ეიფორიული ვიყავი, საერთოდ არ მახსოვდა რა ხდებოდა ჩვენს თავს, თუმცა არ მეტყობოდა. მთელი ქორწილი, მოგვიანებით, უკვე ვიდეოჩანაწერით გადაღებული აღვიდგინე”, - განაცხადა სალომე ბაკურაძემ.