2020 წელი სასიამოვნო მოვლენებით არ დაიწყო, თუმცა კინოინდუსტრია ჩვენს გახარებას ნამდვილად აგრძელებს. გასართობი, დრამატული სიუჟეტები, ჩახლართული დეტექტივები თუ მისტიკა − სერიალების მოყვარულებს საშუალება აქვთ ახალი შოუ საკუთარი გემოვნების მიხედვით იპოვონ. ფემინიზმისა და თანასწორობის აქტუალური თემები, საკულტო რომანების ეკრანიზაციები თუ არასტანდარტული ისტორიები − აი, რას გპირდებათ მიმდინარე კინოსეზონი:

უცხო / The Outsider
დეტექტიური თრილერი, რომელიც სტივენ კინგის ამავე სახელწოდების რომანის მიხედვითაა გადაღებული, მაყურებელს კომპანია HBO-მ წარუდგინა. სერიალი შოკისმომგვრელი მოვლენით იწყება − შტატ ჯორჯიაში პატარა ბიჭის მკვლელობას აქვს ადგილი. ეჭვს ბავშვის ბეისბოლის მწვრთნელზე მიიტანენ, მაგრამ გამოძიების პროცესი მოულოდნელად იცვლება, როცა საქმეში ვიდეოჩანაწერი ჩნდება. ამ კრიმინალურ დრამას მისტიკური განვითარება აქვს და საკუთარ ჟანრში უკვე ერთ-ერთ უმაღლეს პოზიციას იკავებს.

არაორთოდოქსი / Unorthodox
Netflix-ის ეს მინისერიალი 19 წლის გოგონას ცხოვრებაზე მოგვითხრობს, რომელიც დახურულ ებრაულ წრეში გაიზარდა, ბრუკლინში. გარკვეული დროის შემდეგ, ის რელიგიური ტრადიციის დაცვის აუცილებლობით გამოწვეულ ვალდებულებას შეეჯახა: გათხოვებას. გოგონამ გაქცევა გადაწყვიტა და გეზი ბერლინისკენ აიღო. შოუმ უამრავი მაყურებლისა და კრიტიკოსის გული მოიგო. არასტანდარტული სიუჟეტი, რომელიც ჩაკეტილი რელიგიური საზოგადოების ცხოვრებაში გვახედებს და მთავარი გმირის შინაგან ბრძოლებს წარმოგვიდგენს, „ერთი ნახვით შეყვარების“ გარანტიას ნამდვილად იძლევა.

პატარა კოცონები / little fires everywhere
ამ დრამატული ტელეპროექტის მთავარ როლებში, რიზ უიზერსპუნი და კერი ვაშინგტონი გვევლინებიან. სიუჟეტი ორ რადიკალურად განსხვავებულ ქალზე გვიამბობს − დიასახლის ელენ რიჩარდსონზე და მხატვარ მია უორენზე. მათი ურთიერთობა სხვადასხვა კულტურის, სხვადასხვა სოციალური კლასის წარმომადგენელთა შეჯახების მშვენიერი მაგალითია. მოვლენათა განვითარება ორივე გმირისთვის მოულოდნელი და სიურპრიზებით აღსავსე ხდება.
ამერიკელი მწერლის, სელესტა ინგის რომანის მიხედვით გადაღებულმა სერიალმა მაყურებელი და კრიტიკოსები ორ საპირისპირო ბანაკად გაყო. საზოგადოების ნაწილი მოხიბლული იყო სოციალური თემების გაჟღერებითა და სამსახიობო თამაშით, ნაწილმა კი ის ზედმეტად გროტესკულად აღიქვა. ასეა თუ ისე, „პატარა კოცონები“ წლის ერთ-ერთი ყველაზე განხილვადი პროექტია. საინტერესოა, ვის მხარეს ხართ თქვენ?

MRS. AMERICA
ეს პროექტი კომპანია Hulu-ს ლიდერია. კინოსურათი მაყურებელს 1970-იანი წლების აშშ-ში ამოგზაურებს − ქალების უფლებებისთვის ბრძოლის პერიოდში. სიუჟეტის ცენტრში კონსერვატორი აქტივისტია, იურისტი და პოლიტიკოსი ფილის შლეფლი, რომელიც თანაბარუფლებიანობისთვის აქტიურად იბრძოდა. შლეფლის როლს ქეით ბლანშეტი განასახიერებს. ის განათლებული, ქარიზმატული და ნიჭიერი ქალია, რომელიც ამერიკის ისტორიაში ერთ-ერთ მნიშვნელოვან ფიგურად მოიაზრება.

ჯეიკობის დაცვა / DEFENDING JACOB
ამერიკული კრიმინალური დრამის სიუჟეტის ცენტრში აშშ-ის საშუალოსტატისტიკური წყვილია, რომელთა რეალობაც იცვლება მას შემდეგ, რაც მათ 14 წლის ვაჟიშვილს კლასელის მკვლელობაში დაადანაშაულებენ. მთავარ როლებს კრის ევანსი, მიშელ დოკერი და ჯეიდენ მარტელი განასახიერებენ. სერიალი პერსონაჟების განცდებს − შიშს, სასოწარკვეთას და მტანჯველ შფოთვას ღრმად შეისწავლის. სიუჟეტი სავსეა ინტრიგით და მყარდება ბალანსი ტრაგედიასა და დეტექტივს შორის.