ალენ დელონი და ჟან-პოლ ბელმონდო. დიადი ფრანგი მსახიობები მთელი ცხოვრება კონკურენტები იყვნენ, თუმცა ამას ხელი არ შეუშლია საუკეთესო მეგობრებად დარჩენილიყვნენ. „ის და მე - დღე და ღამე ვართ. ჩვენი კარიერა დასაწყისიდანვე პარალელურად წარიმართა. ორივემ 1960-იან წლებში „გავისროლეთ“ - მან „კაშკაშა მზეზე“, მე „უკანასკნელ ამოსუნთქვამდე“. გვიმუშავია ერთი და იგივე რეჟისორებთან. გადასაღებ მოედანზე ის მობილიზებული იყო, მე მოდუნებული. ცნობილები ვიყავით და შეგვეძლო როლები თავად აგვერჩია. კინოში ორივეს გვყოფნიდა ადგილი“. (ჟან-პოლ ბელმონდო)
თითქმის თანატოლები, (ბელმონდო 1933 წელს დაიბადა, ალენი 1935 წელს) ფრანგული კინოს უმნიშვნელოვანესი ეპოქის სიმბოლოები გახდნენ. ხშირად უწევდათ მსგავსი, მარტოსული, ჩაფიქრებული, რთული პერსონაჟების განსახიერება. მათ ერთობლივ თანამშრომლობას ვხედავთ ფილმებში: „ბორსალინო და კომპანია“, „იყავი ლამაზი და გაჩუმდი“; „ერთი შანსი“.
ორი კინოვარსკვლავის შუღლი ჯერ კიდევ „ბორსალინოში“ დაიწყო. დელონისა და ბელმონდოს მონაწილეობით გადაღებულ ფილმს მთელი საფრანგეთი ელოდა და როგორც კი ის კინოეკრანებზე გამოვიდა, გრანდიოზული სკანდალი მოყვა. მთელ პარიზში გაკრული აფიშების დათვალიერებისას ბელმონდო გაბრაზდა და კოლეგას სასამართლოში უჩივლა. გადაღებების დაწყებამდე პროდიუსერებმა, იცოდნენ რა ორივე მსახიობის ამბიციური ხასიათი, დაამშვიდეს, რომ მათი სახელები სარეკლამო პლაკატებზე ერთ ხაზში და ერთი შრიფტით დაიწერებოდა.
როცა ჟან-პოლმა აფიშებზე საიკითხა: „ალენ დელონი წარმოგიდგენთ.... ალენ დელონს და ჟან პოლ-ბელმონდოს...“, მაშინვე სასამართლოს მიაკითხა. მთელი საფრანგეთი აკვირდებოდა როგორ გაარკვევდა ორი მამაკაცი ვინ იყო მთავარი. შეკამათებულმა ბელმონდომ და დელონმა კონტაქტი შეწყვიტეს. როცა ფილმში „ერთი შანსი“ ისევ ორივე მიიწვიეს, გადაწყვიტეს ომი დაესრულებინათ და მეგობრული ურთიერთობა აღედგინათ.
საზოგადოების ნაწილი ფიქრობდა, რომ მსგავსი „გიგანტების შერკინება“ სავალალოდ დასრულდებოდა. საბედნიეროდ, ასე არ მოხდა. ალენი და ჟან-პოლი მეგობრებად დარჩნენ. როცა ბელმონდო ავად გახდა, მის პალატაში პირველი დელონი მივიდა.