კატო კიკაბიძის პროფესიული კავშირი ამიერკავკასიაში ერთ-ერთ ყველაზე გამორჩეულ ქართულ კომპანიასთან შედგა და PR-ისა და მარკეტინგის სამსახურის ხელმძღვანელის ამპლუაში „ლიდერფუდის“ ერთგული მომხმარებლებისთვის ბრენდის პროდუქციისა და რაც მთავარია, განწყობების გაზიარება მიზნად დაისახა.
ხორცპროდუქტების ქართული კომპანია ათეულ წელზე მეტია საქართველოს მთელ ტერიტორიაზე ოპერირებს და 1 ჰექტარზე განთავსებული საწარმო 100-ზე მეტი დასახელების ხორცპროდუქტს განსაკუთრებული რეცეპტურით ამზადებს. რეცეპტები გერმანელ ექსპერტ მარსელ საპერნიკს ეკუთვნის, ნედლეულს კი „ლიდერფუდისთვის“ გერმანული კომპანია Tonnies საქართველოში აგზავნის. ამ ფაქტის გარდა, ხარისხის განმსაზღვრელი ქართული ხორცპროდუქტების უმსხვილესი მწარმოებლისთვის „FSSC 22000 სერტიფიკატიცაა“, რომელიც საერთაშორისო სტანდარტის გათვალისწინებით მიღებული უმაღლესი ხარისხის ნიშანს გულისხმობს. კატო კიკაბიძე OK!-ის „ლიდერფუდის“ გუნდის, დასახული მიზნებისა და სამომავლო გეგმების შესახებ ესაუბრა.
როგორ გახდა თქვენი სამუშაო სივრცე „ლიდერფუდის“ უდიდესი საწარმო?
სანამ ჩემი სამსახური „ლიდერფუდს“ დაუკავშირდებოდა, მეტ აქცენტს ფრილანსერის ამპლუაზე ვამახვილებდი. თუმცა, როცა არც ისე შორეულ წარსულში, აქ გასაუბრებაზე, გაყიდვების სამსახურის ხელმძღვანელის, რომა ანთაძის მოწვევით, ხელმძღვანელობის დანარჩენ წევრებს შევხვდი, მივხვდი, რომ სივრცე ჩემთვის საინტერესო, ორგანული ნაწილი გახდებოდა. სამოქმედო გეგმაზე ერთსულოვნად შევთანხმდით და მას შემდეგ, ყოველი დღე ჩემთვის მაშინდელი ურთიერთშეთანხმების მსგავსად კომფორტულია.
როგორია საქმიანი „შიდა სამზარეულო“ გემრიელი ხორცპროდუქტების მწარმოებელ კომპანიაში?
ვერასოდეს გავაკეთებდი საქმეს, რომლის შინაარსიც ჩემთვის მისაღები არ არის. „ლიდერფუდის“ სრული პოლიტიკა და, რაც მთავარია, მისი პროდუქციის ხარისხი საშუალებას მაძლევს, თამამად, სიამაყით შევთავაზო ის მომხმარებელს.
გუნდის თითოეული წევრი ამ განწყობით ეკიდება საქმეს. დილა ადრიანად იწყება და ვცდილობ მაქსიმალურად ადგილზე დავრჩე, ნებისმიერი შეხვედრა ადგილზევე დავთქვა, რადგან ყოველ წუთს, შესაძლებლობა მქონდეს ჩვენი საქმიანობის მაჯისცემას ვგრძნობდე. კოორდინირებულად ვშრომობთ იმისათვის, რომ კომპანია ღირსეულად წარმოვადგინოთ და ჩვენი ჯაჭვი არცერთ რგოლში არ დასუსტდეს.
ჩვენი მთავარი „შიდა სამზარეულოს“ – წარმოების 1 ჰექტარზე არსებული სივრცის ნახვა თუ სურს, მომხმარებელს ნებისმიერ დროს შეუძლია. დააკვირდნენ როგორ მზადდება, იფუთება და იძენს საბოლოო სახეს ხორცპროდუქტების 100-ზე მეტი სახეობა, რომელიც დახლზე ხვდებათ.
პროფესიული თვალსაზრისით, რამდენად საინტერესო გამოწვევაა PR-ისა და მარკეტინგის ასპექტებზე საკვები პროდუქტების მიმართულებით მუშაობა? იმაზე, რასაც მომხმარებელი ჯერ მხოლოდ ხედავს, მთავარი სამარკო ნიშანი კი, გემოა...
სპეციფიკა, რა თქმა უნდა, განსხვავებულია. შენ პირდაპირი, ყოველდღიური შეხება გაქვს მომხმარებელთან. წარმოადგენ მასპროდუქტს, რომელიც ჩნდება შენს სამზარეულოში. ეს ხომ უდიდესი პასუხისმგებლობაა, რაც ჯანსაღი პროდუქტისა და გემოს შეთავაზების თვალსაზრისით გეკისრება.
სწორედ იმის გათვალისწინებით, რომ მომხმარებელი ვერ ეცნობა ჩვენს საფირმო გემოს, მას უპირველესად იმ მთავარს – განწყობას ვთავაზობთ, რომელიც მთელ კომპანიაში გადამდებია. მეგობრული, ლაღი და უშუალო დამოკიდებულება, რაც აქ მომუშავე პერსონალს გვაერთიანებს, გვინდა, საზოგადოებამდე მივიდეს. სწორედ ამის მაგალითია სლოგანი – „ბედნიერი... გემრიელი მომენტებისთვის“, რომლის ნაწილად ყოფნაც „ლიდერფუდს“ სურს.
თანამედროვე სამყაროში ყველაზე ახლო ურთიერთკავშირის მისაღებად, სოციალური ქსელები მთავარი ინსტრუმენტია, სადაც „ლიდერფუდი“ აქტიურობით გამოირჩევა. თავად ხართ ჩართული კომპანიის საქმიანობის ამ მიმართულებაშიც?
ამ მიმართულებაშიც, ჩემს გრაფიკოს დიზაინერთან ერთად, თავიდან ბოლომდე ჩართული ვარ და მეტიც – ამ „ფუფუნებას“ არავის ვუთმობ, რადგან მგონია, რომ ზუსტად ამ გზით არის შესაძლებელი მომხმარებელთან სწორი, მუდმივი კომუნიკაცია, განწყობის შექმნა და საინტერესო თანამშრომლობა.
სოციალური ქსელით ხშირად სწორედ „ბედნიერი მომენტებისთვის“ საჭირო რეცეპტებს ვათავსებთ, რომელიც კულინარიაში ხორცპროდუქტების გამოყენების სრულიად ახლებურ ტენდენციებს ამკვიდრებს.
რას მიიჩნევთ „ლიდერფუდის“ გამორჩეულად ძლიერ მხარედ?
ეს, უპირობოდ, ხარისხია. ასევე მრავალფეროვანი არჩევანი, რომელიც 100-ზე მეტი პროდუქტის სახით არის წარმოდგენილი. ჩვენს მენიუში არაერთი ექსკლუზიური სახეობის ხორცპროდუქტია, რომელიც გერმანელ ექსპერტ მარსელ საპერნიკის მიერ შემუშავდა.
ასევე, რასაც „ლიდერფუდის“ წარმატების მთავარ საფუძველად მივიჩნევ, ისაა, რომ კომპანია არასოდეს იტყუება, ღიაა ნებისმიერი თვალსაზრისით. ეს არის ადგილი, სადაც გარდა აქ მომუშავე მეგობრული კოლექტივისა, ხშირად სტუმრობა მათ მეგობრებსა და ოჯახის წევრებსაც უხარიათ და ვფიქრობ, ეს ბრენდისთვის უდიდესი პრივილეგიაა.
გამოდის, რომ „ლიდერფუდი“ ბევრისთვის კომფორტის ზონაა...
ნამდვილად ასეა. პირადად მე, ჩემი სამუშაო კომფორტის ზონას მივაგენი. იმდენად მსიამოვნებს დახარჯვა, რომ შაბათ-კვირასაც სიამოვნებით ვერთვები კომპანიასთან დაკავშირებულ ნებისმიერ აქტივობაში. ჩართული ვარ იმაშიც კი, რაც საკუთარ მოვალეობაში არ შედის. მგონია, რომ ჩემი მხრიდან ეს გულწრფელი დამოკიდებულება კომპანიის დამსახურებაა.
როგორია „ლიდერფუდის“ სამომავლო გეგმები?
„ლიდერფუდის“ მარკეტების ქსელი საქართველოს მასშტაბით ამჟამად 19 ლოკაციაზეა, სადაც ექსკლუზიური ხორცპროდუქტების გარდა, მომხმარებელს სხვა მრავალფეროვანი ასორტიმენტი დახვდება. ჩვენი მიზანი ფილიალების რაოდენობის ზრდა და, რაც მთავარია, არჩეული კურსიდან გადახვევის გარეშე წინსვლაა.