აპრილი სამეფო ოჯახის წევრებისთვის განსაკუთრებული თვეა, რომელიც მნიშვნელოვანი თარიღებითაა დატვირთული. გარდა იმისა, რომ ოჯახი ახალ წევრს ელოდება, 21 აპრილს დედოფლის დაბადების დღე იყო, დღეს კი, 23 აპრილს პრინცი ლუის პირველი დაბადების დღეა. ამის აღსანიშნავად პრინცმა უილიამმა და ქეით მიდლტონმა მისი ფოტოები გაგვიზიარეს. ფოტოები ნორფოლკის სახლის ბაღშია გადაღებული.
ლუის არაჩვეულებრივ ფოტოებს შემდეგი წარწერა აქვს დართული: "ჰერცოგსა და ჰერცოგინიას აქვთ პატივი გაგიზიარონ პრინცი ლუის ახალი ფოტოები მისი დაბადების დღის საპატივცემულოდ. ფოტოები კემბრიჯის ჰერცოგინიის მიერ აპრილის თვეში, ნორფოლკში არის გადაღებული."
ლუის რამდენიმე ფოტოში წითელი ნაქსოვი ჯემპრი აცვია, რომელსაც მის ფონზე გაშლილი სიმწვანე ამშვენებს. მესამე სურათისთვის კი პრინცმა ლურჯი ზედა "მოიხდინა".
ქეით მიდლტონის მიერ გადაღებული ფოტოები საკმაოდ მაღალი ხარისხითა და დახვეწილობით გამოირჩევა, რაც მის ამ სფეროში გამოცდილებასა და დახელოვნებაზე მეტყველებს.
აღსანიშნავია, რომ უკანასკნელი შემთხვევა, როდესაც სამეფო ოჯახის გულშემატკივრებმა პატარა ლუის ფოტო იხილეს, ოჯახური საშობაო ბარათი იყო, რომელშიც ლუი ოჯახურ ფოტოსესიაში მონაწილეობს.