ყველაფერი მაშინ დაიწყო, როცა გამოჩენილმა ქართველმა კომპოზიტორმა ვარსკვლავის ნიჭი აღმოაჩინა. გიო ხუციშვილი ყვება: ,, ერთხელ გია ყანჩელი ჩვენთან მოვიდა, მაშინ ძალიან პატარა ვიყავი, მოისმინა ჩემი სიმღერა, დილას კი გამომიარა, „მელოდიაში“ წამიყვანა და ყველა სიმღერა ჩამაწერინა, რასაც მაშინ ვმღეროდი. მადლობელი ვარ გიასი, რომ ბავშვობის ნამღერი დამრჩა. ბავშვობაში ზუკაზე მაღალი ხმა მქონდა. ახლა ამ ჩანაწერს ძალიან ვუფრთხილდები... მიხარია, რომ გია ყანჩელის დამსახურებით ეს ხმა შემომრჩა. ჩემი სცენაზე ასვლა კი მამუკა ჩარკვიანის „ბრალია“... სტუდენტობის მერე მე და მამუკა ჩარკვიანი მამუკას სიმღერას ვმღეროდით, ერთხელაც სცენაზე ავედით და შემოვრჩით”.
უკვე დღეს, თბილისის დიდი საკონცერტო დარბაზის წინ გიო ხუციშვილის ვარსკვლავი გაიხსნება. შემოქმედებითი საღამო „თბილისი არის ურთიერთობა“ საღამოს 20:00 საათზე დაიწყება, მისი დასრულების შემდეგ გახსნილ ვარსკვლავს კი, წარწერით „არა მარტო გიო ხუციშვილი, მთელი ჩემი თაობა“, გიო ხუციშვილი აფხაზეთში დაღუპულებს მიეძღვნება, ადამიანებს, რომლებთან ერთადაც ის 90-იან წლებში იბრძოდა.
„ეს ვარსკვლავი ეკუთვნის მთელ ჩემ თაობას. ძალიან გახარებული ვარ, ძალიან მინდა ამ ხალხთან შეხვედრა და მადლობის თქმა ყველაფრისთვის. ჩემს მსმენელს ვეტყოდი, რომ ძალიან მიყვარს“, – ამბობს მომღერალი.
კონცერტში მონაწილეობას ნატო გელაშვილი, ლელა წურწუმია, მაია ჯაბუა, თამრიკო ჭოხონელიძე, ეკა კახიანი, ნუკრი კაპანაძე, მერაბ სეფაშვილი, თემურ თათარაშვილი, დავით გომართელი, ანსამბლი "ფორტე" და სხვები მიიღებენ, საღამოზე ცნობილ კომპოზიციებთან ერთად, ერთადერთი სიმღერის პრემიერა შედგება, რომელსაც მომღერალი შვილთან და „შვიდკაცასთან“ ერთად ასევე აფხაზეთს უმღერებს.
შვილთან, გიო ხუციშვილთან ერთად, წლების წინ ჩაწერილი დუეტი ქართველ მსმენელს დღესაც კარგად ახსოვს.
მსმენელისთვის გამორჩეულად საყვარელია დუეტი ნატო გელაშვილთანაც.
კონცერტის რეჟისორია ბაკურ ბაკურაძე, რომელმაც გიო ხუციშვილზე ფილმიც გადაიღო. ფილმი მისი ცხოვრების გზას ასახავს დასაწყიდან დღემდე, სადაც თავად გიოა მთხრობელი. ფილმი ფილარმონიის დარბაზში ეკრანზე იქნება ნაჩვენები. ,,მომღელისთვის მნიშვნელოვანია ერთი რამ, მაყურებელს მადლობა გადაუხადოს, რადგანაც თუკი გიო ხუციშვილი როგორც მომღერალი შედგა, მიაჩნია, რომ ეს მაყურებლის დამსახურებაა და ამ კონცერტს სწორედ მათ უძღვნის!" - ამბობს ორგანიზატორი დავით ოქიტაშვილი.
მომღერალი სასიმღერო კარიერაზე აქტიურად მუშაობს, 2 წლის წინ მან ახალი ბენდიც ,,გიო+“ შექმნა, ისინი ძველ ქართულ სიმღერებს სრულიად ახლებურ ჟღერადობას აძლევენ.